Dimanche de Pâques

Resurréxi, et adhuc tecum sum, allelúia : posuísti super me manum tuam, allelúia : mirábilis facta est sciéntia tua, allelúia, allelúia. R/ Dómine, probásti me et cognovísti me : tu cognovísti sessiónem meam et resurrectiónem meam. V/.Glória Patri.

Hæc dies, quam fecit Dóminus : exsultémus et lætémur in ea. V/. Confitémini Dómino, quóniam bonus : quóniam in sǽculum misericórdia eius.

Allelúia, allelúia. V/ Pascha nostrum immolátus est Christus.

Víctimæ pascháli laudes ímmolent Christiáni. Agnus rédemit oves : Christus ínnocens Patri reconciliávit peccatóres. Mors et vita duéllo conflixére mirándo : dux vitæ mórtuus regnat vivus. Dic nobis, María, quid vidísti in via ? Sepúlcrum Christi vivéntis et glóriam vidi resurgéntis. Angélicos testes, sudárium et vestes. Surréxit Christus, spes mea : præcédet vos in Galilǽam. Scimus Christum surrexísse a mórtuis vere : tu nobis, victor Rex, miserére. Amen. Allelúia.

Terra trémuit, et quiévit, dum resúrgeret in iudício Deus, allelúia.

Pascha nostrum immolátus est Christus, allelúia : itaque epulémur in ázymis sinceritátis et veritátis, allelúia, allelúia, allelúia.

O filii et filiæ, Rex cælestis, Rex gloriæ, Morte surrexit hodie. Et Maria Magdalene, Et Jacobi et Salome, Venerunt corpus ungere. A Magdalena moniti, Ad ostium monumenti Duo currunt Discipuli. Sed Joannes Apostolus Cucurrit Petro citius, Ad sepulcrum venit prius. In albis sedens Angelus, Respondit mulieribus, Quia surrexit Dominus. Discipulis astantibus, In medio stetit Christus, Dicens : Pax vobis omnibus. Postquam audivit Didymus, Quia surrexerat Jesus, Remansit fide dubius. Vide, Thoma, vide latus ; Vide pedes, vide manus, Noli esse incredulus. Quando Thomas Christi latus, Pedes vidit atque manus, Dixit : Tu es Deus meus. Beati qui non viderunt, Et firmiter crediderunt : Vitam æternam habebunt. In hoc festo sanctissimo, Sit laus et jubilatio : Benedicamus Domino. De quibus nos humillimas, Devotas atque debitas Deo dicamus gratias