Epiphanie du Seigneur

Ecce, advénit dominátor Dóminus : et regnum in manu eius et potéstas et impérium. Deus, iudícium tuum Regi da : et iustítiam tuam Fílio Regis.

Omnes de Saba vénient, aurum et thus deferéntes, et laudem Dómino annuntiántes. V/. Surge et illumináre, Ierúsalem : quia glória Dómini super te orta est.

Allelúia, allelúia. V/ Vídimus stellam eius in Oriénte, et vénimus cum munéribus adoráre Dóminum. Allelúia.

Laetabundus exsultet fidelis chorus. Alleluia. Regem regum intactae profudit thorus: res miranda. Angelus consilii natus est de virgine: sol de stella. Sol occasum nesciens, stella semper rutilans, semper clara. Sicut sidus radium, profert Virgo Filium, pari forma. Neque sidus radio, neque mater filio, fit corrupta. Cedrus alta Libani conformatur hyssopo, valle nostra; Verbum ens Altissimi corporari passum est, carne sumpta. Isaias cecinit, Synagoga meminit, numquam tamen desinit esse caeca. Si non suis vatibus, credat vel gentilibus; Sibyllinis versibus haec praedicta. Infelix, propera, crede vel vetera: cur damnaberis, gens misera? Quem docet littera, natum considera: ipsum genuit puerpera. Alleluia.

Reges Tharsis, et ínsulæ múnera ófferent : reges Arabum et Saba dona addúcent : et adorábunt eum omnes reges terræ, omnes gentes sérvient ei.

Vídimus stellam eius in Oriénte, et vénimus cum munéribus adoráre Dóminum.

Domine salvum fac regem et exaudi nos in die qua invocaverimus te. Gloria Patri et Filio, et Spiritui Sancto. Sicut erat in principio et nunc et semper et in saecula saeculorum, amen.